[Brên byrp yw hwn...] Wel, yn amlwg mae hyn yn rhywbeth sy wedi bod ar fy meddwl i ers sbel! Dw i'n credu y peth mwya gall unrhyw unigolyn wneud i hybu blogio yn y Gymraeg yw... aros amdano... blogio, yn y Gymraeg! Mae nifer o weflogiau Cymraeg wedi codi yn diweddar (gweler y rhestr 'ma, a rhoi gwybod os wyt ti'n gwybod am fwy), ond beth sy angen yw mwy o flogiau Cymraeg sy'n cael eu diweddaru. Byddai'n ddigon posibl - 'sai rhywun gyda'r amser i roi i hyn - sefydlu rhyw wasanaeth llety arbennig i weflogiau Cymraeg, rhywbeth tebyg i Blog*Spot, Blogware, Blog City ac yn y blaen. Byddai'n siwr o fod yn ddigon hawdd cael arian gan Fwrdd yr Iaith am wneud rhywbeth fel hyn, ond yn fy marn i byddai hynny yn dinistrio'r peth cyn iddo ddechrau. Does neb sy ddim yn blogio ddim yn blogio achos prinder arian, naci prinder llefydd am ddim i barcio eu blogiau. Prinder awydd yw'r broblem, prinder diddordeb. Fel dyn ni wedi gweld ar maes-e.com, does dim prinder o siaradwyr Cymraeg sy'n fodlon defnyddio'r iaith ar y we. Pam dydy'r bobl yma ddim wedi mynd ati i ddechrau eu gwefannau eu hunain 'te? Safety in numbers? Mae blogio yn y Gymraeg yn gallu bod yn unig iawn, yn enwedig i'r rhai sy'n disgwyl bod yn seren dros nos ar ôl dechrau blog. Mae'n llawer haws postio rhywbeth ar maes-e lle bydd cannoedd o bobl yn ei ddarllen, na i roi fe ar ryw blog di-ar-ffordd ble bydd hanner dwsin yn ymweld bob dydd. Yn y bôn, y broblem yw bod "y we Gymraeg", y rhithfro, beth bynnag, yn rhyw 5 mlynedd tu ôl i'r prif-frwd o'r we. Mae erthyglau yn y cyfryngau Cymraeg dal yn cael eu sgwennu ar "lefel mynediad". Cofiwch, dyn ni'n dal heb bapur newydd dyddiol yn y Gymraeg, felly does dim syndod bod blogio yn y Gymraeg wedi bod bach yn araf i ffynnu. [Byrp drosodd.]